Marhata Batak ma Hita: Alus ni SMS tu Boa-boa ni Rapot

sms

Sadari on, adong na mambahen ahu sengkel saotik. Ala marningot na naeng marrapot do Marturia ari Sinen tanggal 29 Juni 2009 di Sekretariat pukul 18.30 WIB – songon na somal huulaon molo manjou rapot nang di parpunguan di dia be i, i ma pasahathon boa-boa piga ari so tung jumpang arina i – na sogotan adong ma hutongos SMS tu sude pangurus na adong di ahu nomor ni HP-na (i ma angka na ro jala mangisi daftar hadir di tingki rapot na salpu …). Songon on ma hatana: “Boa-boa parjolo: ari Sinen, 22 Juni marrapot do hita di Sekretariat pkl 18.30. Robe ma hita. Horas!”. Adong do na sala? Adong, i ma tanggalna. Ingkon 29 Juni do. Boha do tanggapan ni angka dongan na manjalo SMS i? On do. Sian 32 nomor na hutongos boa-boa i, adong ma lima halak na mangalusi. Dua halak ma i holan pasahathon mauliate. Tolu na i na asing manungkun: atik na tanggal 29 do maksudna? Dia do na toho? Artina, holan 16% do na ro alusna. Mansai otik do, ate?

Dung i, hutongos ma muse SMS paduahon. Suman tu na parjolo, apala adong otik na hutambai. Songon on ma isina: “Boa-boa paduahon: ari Sinen, 22 Juni marrapot do hita di Sekretariat pkl 18.30. Robe ma hita pasahathon prgrm kerja. Horas!”. Holan dua do na mangalusi, i ma tarmasuk na parjolo i. Mandok: “tanggal 29 do, amang …”.

Patoluhon, hutongos ma muse songon on: “Boa-boa paduahon: ari Sinen, 29 Juni marrapot do hita di Sekretariat pkl 18.30. Robe ma hita pasahathon prgrm kerja. Horas!” On ma na toho, i ma tanggal 29 Juni 2009. Piga halak do na mangalusi? Sahat tu tingki on, holan sada do na mangalusi. I pe mandok na so boi ro ala marrapot dohot pandita di distrik … Dagga, fuang …

Dia do na boi huparsiajari sian barita ne metmet i? On ma ra na boi dohonon:

(1) Hurang las do rohanta manjaha. Molo manjaha pe, ndang pola nunut.

(2) Hurang do hita mangargai na binahen ni dongan. Molo ahu, antar sude do SMS na ro tu ahu ingkon alusanku. Pinomatna mandok mauliate di boa-boa nasida na hujalo. Sian dia do ahu marsiajar na songon? Sian dua halak. Sada ma i Direktur nami na uju i, i ma na ingkon alusanna sude SMS na ro tu ibana, nang pe sian bawahanna na dao di toru pangkatna. Paduahon ma i simatuaku. Ingkon do alusan nasida angka SMS na masuk, na umotik ingkon adong alusna: “pesan sudah diterima”.

(3) Ndang pola lomo rohanta paboahon na sala na binahen ni dongan. Adong do dengganna na songon on, alai dumengganan molo paboahon tu dongan i dia na sala jala asa dipature muse (asalma denggan dalan paboahonna …).

(4) Mangholit. Mangholit? I do. Mangholit di tingki (“ah, loja nai iba mangalusi na songon on, pasuang tingki …), manang mangholit di hepeng (“arga nuaeng pulsa, binolongkon ma muse laho mangalusi SMS on?“); hape tung mansai mura do nuaeng ongkos mar-SMS ala adong do na holan Rp 50,- par SMS; jala adong do muse na garatis! Manang adong do muse – on ma na umborat … – mangholit di holong ni roha (“rohana ma di si, i do ulaon ni bae i …”). Anggiat dao ma na songon on sian hita, ate?

Alai anggo ahu, ndang pola dia sidohononku manang na dia di bagasan rohangku. Ala huhilala on ma na otik na boi bahenonku di bagasan panghobasion di huria, ingkon rade do jaloonku manang na boha angkupna. Sai adong do tubu di pingkiranku: “Manang boha pe borat ni sitaononmu saleleng marhobas di huria i, sai na adong do muse na umborat sian i haduan. Rade ma ho …”. I ma na tutu si tutu.

Iklan

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s