Hamunama na Umpunasa Gareja On …

Minggu, 24 Oktober 2010

Molo holan mangida roster panghobasion, di parmingguan on ahu gabe panjaha tingting di parmingguan botari. Ala naeng mamboan borungku si Auli mandohoti konser di kursus musik na niihuthonna si nuaeng di Yamaha Music Course di Minggu tanggal 31 Oktober haduan di Bandung, i ma binahen na hupangido asa ahu marganti dohot dongan sintua na asing asa rade nasida mangganti ahu di tanggal 31 na naeng ro. Tanggal 31 i ahu marhobas gabe harentaon di parmingguon batari. Ahu ma mangganti nasida marhobas di Minggu tanggal 24 on. Dapotma i donganku na rap marsiajar gabe sintua learning na uju i. Di parsermonan parhalado partohonan na di ari Kamis na salpu (na nidohotan ala naeng maragenda di ari Minggu na), nunga hupaboa hian tu inang calon pandita songon parhalado na manguluhon sermon di tingki manigati angka panurgasi. Molo songon i, di Minggu tanggal 24 panghobasionku gabe harentaon di parmingguon manogot (mangganti nasida dongan sintua) jala panjaha tingting di parmingguon botari (songon na tarsurat di roster naung tinontuhon hian).

Ari Jumahat borngin (tanggal 22 Oktober 2010) di pardalanan laho tu Jakarta hutongos ma sungkun-sungkun tu inang calon pandita taringot tu ise do na gabe parhobas tu MInggu tanggal 24. Saut do songon na hupangido i? Lobi sajom ndang adong alusna (dungkon i huboto ma muse, na marmotor do nasida di tingki umbahen na so nialusan nasida dope SMS hi …), hutongos ma sungkun-sungkun i tu donganku sintua na hami marganti marhobas jala manigor hatop do ro alusna: “saut do lae songon na pinangido ni lae i”.  Marpiga jom dungkon i ro ma muse alus ni inang calon pandita na mandok ahu marhobas gabe harentaon di parmingguan manogot, mangajar di Kelas Pra-sidi andorang so masuk parmingguan botari, jala gabe harentaon di parmingguan botari las huhut panjaha tingting.

Songon i ma pardalananna. Ala ni Debata, tupa do i saluhutna. Dungkon sahat di gareja di tingki manjaha harotas liturgi dohot tingting na nibagihon tu sude ruas parminggu, di si ma huboto na amang pandita resort do hape maragenda jala amang pareses na marjamita. Ala huboto ndang adong di roster tarsurat na pandita resort maragenda, husungkun ma nasida: “Boasa gabe amang na maragenda?”, jala dialusi ma, “Olo do gabe lupa, Amang. Sipata ndang niingot mandongkon deba pandohan ni paragendaon i be. Jadi, ingkon tong do marsiajar, Amang …”. “Ai marsiajar dope guru, Amang?”, ningkuma las huhut haruar sian bilut parhobasan manangkasi angka dongan parhobas di parmingguon manogot on (tarlumobima i penyambut jemaat na manjalangi ruas na ro di jolo ni pintu gareja huhut mambagi harotas liturgi, hape ndang adong dope nanggo sahalak sian nasida na dua na ro, gabe ahu ma na marbagi harotas i). Di langgatan, nunga rade be aek di bagasan ingananna na sian perak, ala adong sahalak dakdanak (anak ni dongan katua punguan ama ni huria on) na naeng manjalo pandidion sadari on.

Songon i do hot sahat tu nuaeng di hakabepe on? Ingkon pandita resort na maragenda molo ro boss-na pareses? Ai tor boha do huroha molo pareses?”, manungkun sahalak ama. Ala hubereng sungkun-sungkun i dilapit sada giot ni roha na hurang denggan otik, hualusima, “Ah … di portibi on dope hita, amang. Boi dope masa na songon i. Tahalashon ma. Alai ndang taboto, atik na tingki nasida do huhut maragenda sadari on …”.

Sampulu minut andorang pukul sia, i ma partingkian laho masuk parmingguan, ro ma inang calon pandita manjumpangi ahu di jolo pintu ni gareja. “Nunga dipaima amang di bilut parhobasan asa martangiang laho mamungka panghobasion”, ninna nasida, gabe hupasahatma harotas na adong dope di ahu tu sada dongan sintua na ingkon ro hian sian nangkinan ala martugas mambagi harotas parliturgian tu angka ruas na ro. “Santabi, hamu ma manorushon, ate amang. Tu bilut parhobasan ma ahu saonnari”.

Di bilut parhobasan, nunga gok parhalado marpungu. Hutorushon ma muse mamareso angka parhalado parhobas marhite harotas parliturgian na adong di ahu. Molo naung ro, hu-contreng ma di harotas i. Hape adong dope piga-piga na so ro (papungu pelean), gabe hupangidoma dongan sintua na asing haradeon nasida laho mangganti. “Jahahon hamu jolo, Amang na martugas”, sada inang sintua papungu pelean manghusiphon tu ahu ala so hujahahon angka goar ni na marhobas. “Ndang pola be, Inang ala nunga hupareso siang nangkinan jala tangkas do huboto”, huhut hupangido asa jongjong ma saluhutna laho mangarade tu parhobasan parmingguan.

“Horas ma di hita saluhutna. Ala nunga jumpang tingkina, jala naung rade sude na marhobas, mangarade ma hita marhite marende sian Kidung Jemaat nomor …”, dohot udutna (marhata Indonesia do parmingguan manogot on), martangiang, dung i mardalan ma tu bagas joro. Huboto adong do sungkun-sungkun di deba dongan parhalado na sai jempek do “protokoler” na hupatupa di bilut parhobasan molo ahu na gabe harentaon. Saleleng on na hubereng, mansai lomo roha ni angka dongan marganjang-ganjang (bertele-tele, hata Indonesia-na …), hape ruas nunga paimahon di bagas joro. Adong ma i na manjahahon goar ni na marhobas marsada-sada (atik pe naung adong tarsurat di harotas parliturgian …), jala ditangiangkon muse marsada-sada di tangiang paborhathon tu bagas joro. Hape na huboto, ndang pola ingkon songon i. Ni rongkom ma, ala tangiang paborhathon i ndang pola ingkon songon tangiang pangondianon …

Simpul parmingguan, di tingki marsijalangan dope ruas dohot pandita, pareses, dohot sintua paragenda, huhallung ma inganan ni pelean tu bilut parhobasan niurupan sahalak sintua na martugas papungu pelean. Di bilut parhobasan nunga adong piga-piga parhalado, adong ma i sahalak ama na mandok tu ahu, “Hamu nama na umpunasa gareja on sadari on. Molo hubereng di harotas on, holan goarmuna nama amang na tarsurat ala hamu na marhobas manogot, hamu muse na marhobas botari. Mangajar dakdanak muse annon … Hape sian Bandung do hamu ro”. Hualuasi ma denggan, “Songon i do molo hatoban, amang. Ndada ahu na umpunasa gareja on, Debata do. Binsan margogo dope ahu, amang nidalanhon ma sude. Jala diboto amang do i, na adong do alana umbahen na gabe songon i sadari on …”

Iklan

One comment on “Hamunama na Umpunasa Gareja On …

  1. Ido aggo alus ni parhalado
    jala naung diparsahalai Debata do amang marhite tondina tarbahen hamu mangalusi sungkun-sungkun i.
    jala tantangan di namanghobasi bagas ni Debata pe, masai godang do. baik dari dalam maupun luar bilut parhobason.dibahen i, ingkon do ta jalo bisuk na sian Debata, asa unang gabe partuktukan hajonjonganta di sude aspek ni pelayananta.
    selamat melayani
    Syalom

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s