Sayang Ni Hepeng i!

Di sada tingki di parsermonan di bilut parhobasan, muruk ma sahalak sintua. Marbonsir ma i ala ni panorangion ni Panitia Natal taringot tu hepeng na porlu tu Pesta Natal, tarlumobi ala dipatorang Katua Panitia Natal na naeng bahenon ulaon raphat mangan di mata ni pesta i. Andorang so i, nunga adong pangidoan nasida panitia asa sude ruas mangurupi haporluan ni hepeng  laho manumpahi ulaon i. Didok sintua i ma, “Boasa pola adong patupahon raphat mangan? Sayang ma hepeng marjuta-juta pasudahon laho mangan sambing. Ai so hurangan mangan ruasta. Ndang tumagon pasahaton tu korban bencana alam? Umporlu dope tu nasida pangurupion. Lok ma tataon satongkin tarlambat mangan asa mangan di bagasta be pe di ari pesta i”. Dialusi Katua Panitia ma, “I do, amang. Denggan do pangidoan ni amang sintua i. Molo martaringot tu ulaon mangurupi dongan na hona bencana alam, ahu sian parkarejoanhu pe sai dohot do terlibat langsung tu si. Alai ninna rohangku, hotma bahenonta ulaon raphat mangan sahuria songon tanda las ni rohanta di hatutubu ni Tuhanta Jesus”.

Ala hutanda do tangkas nasida na dua, jadi pos do rohangku na sian bulus ni roha nasida do panghataion i. Amang sintua sihol rohana laho mangurupi angka dongan na marsitaonon di Wasior, Merapi, dohot Mentawai; rumingkot do hepeng na naeng laho marsipanganon pinasahat tu nasida manimbangkon pinasuda tu ruas na so hurangan mangan (ala boi dope angka ruas mangan di jabuna sandiri ala rade dope di jabuna be sipanganon na tung mansai tabo …).

Siang pangantusion ni Katua Panitia Natal, porlu do nasa ruas marlas ni roha di hatutubu ni Jesus. Laho patuduhon i, tama do bahenon marsipanganon. Ala pas do muse tanggal 26 Desember i jumpang ari Minggu, jadi haruar parmingguon ma pinatupa marsipanganon. Laos di si ma bahenon acara na hombar tu Natal, i ma pajojorhon, marende, manortor, dohot lan na asing.

Jotjot do ro di pingkiranku suman songon na piningkiran ni dongan sintua i. Alai dos do rohangku tu pandapot ni amanta Katua Panitia Natal i. Alai molo ahu nasida, tumagonan ma bahenon pesta Natal na so pola pasudahon godang hepeng (tarlumobi ma i molo papunguhon hepeng i na tung mansai maol, isarana jolo marungut-ungut ruas i pasahathon, jolo pinaksa angka donateur …). Boi do denggan pardalan ni ulaon pesta Natal i nang pe so pola godang “hepeng na mosok”. Hata Indonesia mandok: “meriah walaupun sederhana, bukan mewah karena berlimpah”.

Lungun do huhilala di piga-piga hali manonton perayaan Natal di talipisi. Binereng ma angka boru-boru na marende marpahean na so suman (tarida dagingna na so pola ingkon pataridahon), jadi ndang adong imbar na tu angka perayaan na asing. Na manortor pe ndang tortor ni Batak, atik tortor ni Batak i pe na dipasuman-suman nama. Gabe dao sian semangat Natal na sabutulna ingkon sederhana. “Ndang badia”, ninna deba dongan.

Di huria nami – nang tu angka dongan na asing – sai huondolhon do asa unang mambahen perayaan Natal palobihu. Ingkon sederhana ma nian. Unang ala ni pesta na dao sian semangat kesederhanaan (ai aha do tahe hata Batak ni “kesederhanaan” on?), gabe dao do hita muse sian tona na binoan ni Natal. So tung sanga lupa hita (nang dohot angka gellengta) na di bara ni pinahan do tubu Jesus …

Iklan

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s