Inong, Salamat Ulang Taon Papitupuluonomhon …!

Hurang tabo do panghilalaanku. Alana: nantuari di ari ulang taon ni natua-tua na manubuhon ahu (sada sian “3 perempuan perkasa” …) i ma dainang pangintubu marulang taon pa-76-hon. Borngin andorang nantuari, tarlambat ahu dungo ala parkarejoan. Manogotna – di ari ulang taon di 23 Maret i – ingkon tumibu borhat  sian jabu ala manogot ingkon manghatai tu sada anggota tim-hu na naeng  borhat tu Cianjur. Dungkon i, naeng pasahathon materi presentasi tu outsourcing nami. Pukul 08.30 ma tingki na dipasahat tu ahu.

Omak ni si Auli nunga pasingothon asa husangahon martalipon tu dainang. Nunga hudok hian sae karejo di ruar kantor ma asa hutalipon muse, hape tingki di mobil tompu dipasahat ibana ponsel huhut didok, “On sian inang. Holan mandok salamat ulang taon pe. Las dokkon ma na naeng borhat tu kantor, annon borngin ma talipon muse”.

Jalo ma hujalo ponsel sian omak ni si Auli jala manghatai dohot dainang. Antar leleng marcarita, na mangalusi abit na jinaitna na tinongos ni omak si Auli, didok ma: “Uli hian do abit na nilehon parumaen i. Dohot do parjait i mandok asa di ibana abit i. Alai umuli do ra mola na rara, ate?”. Hape na pinangido ni dainang do bulan na salpu asa sian hami abit na ratarata na naeng pangkeonna di ulang taon on. Songon i ma natua-tua (hita pe songon i do tong …), sai hurang do sude … Jadi hudokma: “Haduan ma, inong di tingki ulang taon na naeng ro tinongos muse na rara”. Dialusima muse, “Ai mangolu do huroa hape ahu di ulang taonhu na naeng ro?”. Tarsonggot ahu, sanga sip satongkin andorang so hualusi muse, “Bah, boasa inong. Ndang binoto umur. Ai taon na salpu pe songon i do sungkun-sungkun ni Inong. Jala bereng ma, mangolu do sahat tu nuaeng, ‘kan? Pos ma roham, lehonon ni Debata do muse umur, asalma sai las roha …”. Dungkon i hudok ma, annon bodari ma hutalipon muse.

Bodarina, hira-hira pukul sampulu hutalipon ma tu jabu. Ndang tu ponselna be, ala songon i do dipangido dainong asa tumangkas dibege soara na manghatai. I pe sae partangiangan wejk na dipangido asa dainang manjabui di borngin i. Sian talipon tarbege ahu dope ito-itoku dohot angka bere marsigulut marbagi kue ulang taon. “Ipe sae amang partangiangan di jabunta. Jala ipe marmulakan angka tondong. Sanga do mabiar ahu nangkin ala ni ro i udan, so tung so adong na ro. Hape tompu so udan i andorang dimulai partangiangan. Torop do na ro, amang. Jala hupasahat do hamauliateon tu huria dohot tu pangula ni huria songon na nidok mi …”. Ndang pala leleng be hami manghatai ala gaor ni soara angka keluarga di tingki i, jala huboto nunga tung mansai tarlambat laho modom borngin i ala somalna dainong pukul sampulu nunga laho tu podoman. Sian tiur ni soara ni dainong, tangkas do huhilala na mansai las do rohana di ari ulang taon na i.

Talmis do dai ni tobu, umtalmisan do eme sitolu-tolu

Saonnari marlas ni roha ala tamba pasu-pasu di ari hatutubu, umlasan do roha molo Debata mandongani saleleng ni ngolu.

Iklan

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s