Salamat Ulang Taon, Boru Hasian …

Sadari on (28 Maret 2011), marulang taon pasiahon si Auli. Boru hasian. Sasada buhabajunami. Sian manogot, nunga piga-piga angka keluarga martalipon pasahathon salamat ulang taon tu si Auli. Adong do muse na pasahathon marhite pesan pendek (SMS) dohot facebook. Na bodari, tibu hami modom, “Supaya segar besok waktu ulang tahun …”, ninna mak Auli di hatiha i.


Tarsonggot ahu manjaha boa-boa di laptop-hu na adong tarsurat di layarna na adong padanhu laho manuhor laptop di tingki ulang taonna. Lupa ahu, hape di tingki bulan dua bolas taon na salpu di tingki mangido asa tinuhor meam-meamma (Nintendo) di sada mal di Bandung ala juara kelas ibana, husurathon ma padanhi di i-phone na adong di ahu. “Nanti waktu ulang tahunmu, papa belikan yang lebih bagus daripada mainan seperti itu”, i ma hudok hatiha i ala hubereng bohina hurang minar ala sundat tinuhor meam-meamna i.

Nintendo Manang Laptop? Dago, Hatopnai Mardalan Tingki …

Hubereng antong dua juta argana. Hape holan meam-meam do. Na hubayangkon antong tingki dakdanak iba ndang hea na songon i argana dituhor natua-tua i laho silehon-lehon, nang pe jotjot ahu juara di parsingkolaan … (ndang denggan songon i ate?). Asing ni i, na huetong do antong: molo manambai saotiknai boi do dapot laptop na ummarguna sian apala Nintendo. Molo laptop, boi do muse pangkeon laho marsiajar jala tu haporluan na asing, ndang holan laho sipangkeon tu parmeaman. Songon i ma na hupingkiri di tingki i.

Hatopnai mamolus tingki, Ndang nihilala, hape jumpang ma ari ulang taon ni borungki. Nunga piga-piga ari parpudi on sai maos do hami mangalului panggadisan laptop, hape ndang jumpang nanggo sada na suman. Nantuari manghatai ma hami na tolu: ahu, si Auli dohot omakna. Jala adong ma dos ni pangkataion: lima mansam ma tuhoron alat-alat tulisna paima dapot laptop na pas. I ma hadiah sian omakna. Sian ahu?  “Nanti papa belikan apa yang bagus waktu ke Beijing bulan depan”, marjanji ahu muse.

Mangombus Lilin, Songgot-songgot

Sada hasomalan do di parsingkolaanna molo na marulang taon mambagi bingkisan tu angka donganna. Nunga huparade duapulu kantongan na marisi angka hadiah na suman tu dakdanak kalas tolu esde. Nang dipangido sampulu onom songon torop ni donganna sa-kalas, alai hutambai asa adong sibagihononhon tu guruna.

Na sogotan, tarpingkir omak ni si Auli asa manuhor kue ulang taon. Dumenggan do molo adong acara mangombus lilin, hudok nangkin, di tingki mamillit kue situhoron. Nang pe didongkon si Auli ndang somal adong kue ulang taon dipatupa di singkola, alai manggogo hami ingkon bahenon. Jala songon sada songgot-songgot (“kejutan”, bahasa Indonesia-na). Alai jolo nitalipon ma antong tu singkola asa unang tarlambat, so tung sanga haruar dakdanak I sian parsiajaran. Somalna pukul sada do sidung parsingkolaan.

Topet pukul sada hurang sampululima minut, sahat ma hami di parsingkolaan. Dungkon manghatai saotik tu kapala singkola, nangkok ma hami tu kalas nasida. Las roha ni ibu guruna umbereng haroronami. Andorang simpul parsingkolaan, dipaboa ma na naeng mambahen acara ulang taon ni si Auli. Di papan tulis nunga hubereng tarsurat “Happy Birthday, Auli” na sinurathon sada dakdanak donganna sa-kalas. Toho do tarsonggot si Auli mamereng haroronami, jala mansai las rohana. Marende ma angka dakdanak na niuluhon guruna, martangiang ma muse. Dungkon i, dibagi ma puding sasahalak be. Anggo kue black forrest ndang pola dibagi, ala laho tu pagalakhon lilin do antong i, jala pasahathon tu angka guru do antong. Dibagi si Auli ma muse tas na marisi bingkisan na hupatupa sian kantor. Isina i ma: buku tulis laho pamasukkon muse to sampulna (loose file, molo hata Inggerisna), komik na marisi turi-turian sian nusantara, handuk na metmet, block notes, makanan ringan Koko Krunch/Honey Stars, dohot minuman susu sokelat Milo.


Mangan di Ruar

Songon naung niatur hian, mangan bodarina di ruar. Jala si Auli ma na manontuhon ingananna. Pukul onom lewat saotik, ditalipon ibanama ahu laho pasingothon. Ahu pe jalo do mangalap tu jabu. Nunga hudok hian asa dohot ditogihon ibana si Emma pangurupinami asa raphat mangan. “Perlu diajak juga kakak, nak. Jangan hanya membantu Auli aja selama ini. Kalau kita lagi bergembira, kakak juga harus ikut merasakannya”, songon i ma hupatorang tu ibana mangalusi sungkun-sungkunna.  Di tingki mangan, husungkunma pangurupinami i, jala dialusi ibana ma na lasan rohana raphat dohot hami mangan di restoran ini. Jala si Auli pe las rohana manghata-hatai padua-dua di tingki i.

Di tangiang laho mangan, huulangi do muse pasahathon mauliate tu Debata di ari ulang taon ni si Auli. Jala hupangido asa dilehon hahipaon dohot las ni roha di ibana, lam burju marnatua-tua, tarlumobi lam holong rohana di Debata.

Andorang so mulak muse tu kantor di borngin i, hujou ma si Auli tu abinganku. Husungkun ma, manang las do rohana sadari i. Dialusi ibana ma na sonang do ibana ala saluhut na pinatupa dina sadari i. Hudokma tu ibana muse, “Papa bersukacita dan selalu bersukacita sejak kamu ada bersama kami. Dan papa selalu melihat hal-hal yang luar biasa selama kamu ada. Itulah sebabnya papa dan mama selalu berusaha memberikan yang terbaik buatmu sesuai janji kami kepada Tuhan untuk selalu merawatmu dan menjagaimu. Apa yang tidak papa dapatkan ketika seusiamu selalu kami usahakan agar kamu mendapatkannya. Jangan terulang kembali padamu, karena kamu lebih beruntung memiliki orangtua yang lebih mampu memberikan apa yang perlu dan kamu inginkan. Jika besar nanti, kamu harus bisa menjadi orang yang banyak membantu. Seperti khotbah ibu pendeta hari Minggu kemarin, kalau jadi dokter jadilah dokter untuk orang miskin …” Ndang huboto diantusi ibana sude na hudok i, alai pos rohangku sai na adong do na boi siingotanna haduan.



Iklan

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s